ጥቂት ስለ እውቀት

"እውቀትን ፍለጋ የወጣ ሰው ወደቤቱ እስኪመለስ ድረስ
በአላህ መንገድ (ጂሀድ) ላይ ነው" ረሱል(صلى الله عليه وسلم)

"የተማረ ሰው ማለት መሀይምነቱን መቀነስ የጀመረ አንጂ
ከመሀይምነቱ ነፃ የወጣ ማለት አይደለም" አቡ መህዲ

"ልጅህን ቁርአን አስተምረው ፡፡
ቁርአን ሁሉንም ነገር ያስተምረዋል" ሰለፎች

"ትምህርት በደስታ ዘመን ውበት ፣ በመከራ ዘመን መጠለያ ፣
በእርጅና ዘመን ምርኩዝ ነው" ኢብን ሙባረክ

"የሰው ልጅ የአእምሮውን አቅጣጫ እስካልለወጠ ድረስ
ህይወቱ ሊለወጥ አይችልም"ረዋዒኡን ሚነል ፊከር

እውቀትን በመፈለግ ሂደት ውስጥ ጥንቃቄ ልናደርግባቸው ከሚገቡ ጉዳዬች ውስጥ ሁለቱን እንመልከት:-

ኢኽላስ:-  እውቀት ፈላጊ የሆነ ሰው መዳረሻው የአላህን() ፊት መከጀልና የመጨረሻውን ሀገር ማሳመር መሆን ይገባዋል። ከይዩልኝ ይስሙልኝ እጅግ መጠንቀቅ ያስፈልጋል። የአላህ መልእክተኛ እንዲህ ይሉናል።
مَنْ طَلَبَ الْعِلْمَ لِيُجَارِيَ بِهِ الْعُلَمَاءَ أَوْ لِيُمَارِيَ بِهِ السُّفَهَاءَ أَوْ يَصْرِفَ بِهِ وُجُوهَ النَّاسِ إِلَيْهِ أَدْخَلَهُ اللَّهُ النَّارَ .
رواه النسائي وحسنه الألباني في صحيح
"ከሊቃውንት ለመወዳደር ወይም ከሞኞች ለመሟገት ወይም የሰዎችን ትኩረት ወደርሱ ለማዞር ብሎ እውቀትን የሚፈልግ አላህ() እሳት ያስገባዋል።" ከውጭም ሆነ ከውስጥ ከትልቅም ሆነ ትንሽ ሪያእ ንጹህ መሆንን አደራ! ባወቀው ነገር መስራት:-  ከእውቀት ፍሬዎች አንዱ ባወቀው ነገር መስራት ነው። ያወቀና የማይሰራበትን ሰው ከየሁዳዎች የተመሳሰለ ሲሆን ይህንንም አላህ() በቁርአን እንዲህ ሲል ገልፆታል።
مَثَلُ الَّذِينَ حُمِّلُوا التَّوْرَاةَ ثُمَّ لَمْ يَحْمِلُوهَا كَمَثَلِ الْحِمَارِ يَحْمِلُ أَسْفَارًا بِئْسَ مَثَلُ القوم الذِينَ كَذَّبُوا بِآيَاتِ الله وَاللَّهُ لَا يَهْدِي الْقَوْمَ الظَّالِمِينَ
" የእነዚያ ተውራትን የተጫኑትና ከዚያም ያልተሸከሟት ( ያልሠሩባት ) ሰዎች ምሳሌ መጽሐፎችን እንደሚሸከም አህያ ብጤ ነው ፡፡ የእነዚያ በአላህ አንቀጾች ያስተባበሉት ሕዝቦች ምሳሌ ከፋ ፡፡ አላህም በዳዮችን ሕዝቦች አይመራም ፡፡ "
እንዲሁም ያለ እውቀት መስራትንም ከነሳራዎች ጋር መመሳሰላቸውን በሱረቱል ፋቲሀ ላይ እንደተገለፁት የጠመሙት ቢጤ ነው።

አንቺ ውድ እህቴ

አሥ-ሠላሙ ዐለይኩም አንቺ ውድ እህቴ፤ እኔ እወድሻለሁ ከልቤ ከአንጀቴ
ዝምድና ባይኖረን ወይም ጉርብትና፤ ጠባብ ባልሆነው በሰፊው ጎዳና
ተገናኘን እቴ፤ በእስልምና።
ምንም እንዃን ባላይሽም በአይኔ፤ ስለአገኘሁሽ በኢስላም በዲኔ
ከምንም በላይ፤ ደስ ብሎኛል እኔ።
አንቺ ውድ እህቴ እኔ እወድሻለሁ፤ በአኺራ ጀነትን እመኝልሻለሁ።
አንቺ ውድ እህቴ ልንገርሽ አደራ፤ የትም ቦታ ብንሆን አሏህን እንፍራ
ለነገ ስንቃችን መልካምን እንስራ፤ መሄዳችን አይቀር መቼም፤ ወደ አኺራ።
በርቺልኝ እህቴ፤ ፍቅርሽን ሳስበው አልቻለም አንጀቴ
ተንሰፈሰፈልሽ መላው አካላቴ፤ እኔ እወድሻለሁ እስከ እለቴ ሞቴ
በሰላም ኑሩልኝ ውድ የአኺራ እህቴ!!

የማስተዋል ግብዣ 1

አንድ ሰው ወደ ኢማሙ አህመድ ኢብኑ ሃንበል ዘንድ በመምጣት እንዲህ ሲል ይጠይቃቸዋል፡-
ጠያቂው፡- አንቱ ኢማሙ አህመድ ሆይ! ከሰዎች ሰላም የምሆንበት መንገድ እንዴት ነውን?
ኢማሙ አህመድ እንዲህ አሉት ፡ ያንተን ትሰጣቸውና - የእነሱን ያልተቀበልክ እንደሆን ፣
እነሱ አንተን እያስቸገሩህ - አንተ ደግሞ የማታስቸግራቸው ከሆነ ፣
አንተ የእነሱን ጉዳዮች እየፈፀምክላቸው - እነሱ ደግሞ ያንተን ጉዳይ እንዲፈፅሙልህ የምታስገድዳቸው ካልሆንክ ... ከእነሱ ሰላም መሆን ትችላለህ ይሉታል ፡
ከዚያ ሰውዬው እንዲህ አላቸው ፡ አንቱ ኢማሙ አህመድ ሆይ ! ይሄን ማድረግ እጅጉን ይከብዳል'ኮ!!
ከዚያም እርሳቸው እንዲህ አሉት ፡ እስኪ ዝም በል ! ይሄንንም ሁሉ አድርገህ ከእነሱ ሰላም በሆንክ!! ምንጭ፡- ሲየር አዕላሙ ኑበላዕ ( 11-12 )

የማስተዋል ግብዣ 2

አንዲት ሴት ወደ ታዋቂው ዳኛ ሸዕቢይ ዘንድ በመሄድ ባሏን ከሰሰች።
ክሷን ስታቀርብም በለቅሶ ታጅባ ነበር። ዳኛው በለቅሶዋ ስሜቱ በመነካቱ ተከሳሽ ወደሆነው ባሏ ዘወር ብሎ " ይህች ሴት በጣም የተበደለች ይመስለኛል " አለው ።
ባሏም " የነቢዩላህ ዩሱፍ ወንድሞችም በምሽት ወደ አባታቸው ዘንድ ሲመለሱ እያለቀሱ ነበር ። ነገር ግን ተበዳዮች ሳይሆኑ በዳይ ነበሩ ።

የማስተዋል ግብዣ 3

የአእምሮን እድገት ከሚጨምሩ ነገሮች ውስጥ አንድና ዋነኛው አስተዋይ መሆን ነው። ያየውን ሁሉ የሚናገር ህጻን ልጅ፣ የሰማውን ሁሉ የሚያወራ ውሸታም፣ የተመኘውን ሁሉ የሚጠብቅ ሞኝ ነው። ያልታረሰ መሬት ላይ የተዘራ ዘር በአረም ይዋጣል። ሳያረጋግጥ የሚያወራ ጥርጣሬ ህሊናውን ይጎረብጠዋል። አንድ አይኑን አጥቶ ሲያለቅስ ያየኸው ሰው ሁለት አይን አጥፍቶ ሊሄን ይችላል። እጁ ተቆርጦ ያየኸው ሰው ገሎ ሊሆን ይችላል። ለማረጋገጥ መረጃ፣ ላለመታለል መጠንቀቅ፣ ላለመጠርጠር አጢኖ ማስተዋል ያስፈልጋል።

መራር እውነታዎች

1

ዶክተር ገርቢያ አልገርቢ ትባላለች። በሙያዋ ዶክተር ናት። እንዲህ ስትል አስተዋዮችን ታናግራለች፦
"እጅግ አደገኛ እና ውስብስብ የሆኑ ቀዶ ጥገናዎች በሰው ልጅ ወሳኝ ክፍሎች ላይ ይካሄዳሉ። በአእምሮውና በልቡ ላይ። ህይወቱ ባጠቃላይ በነዚህ ክፍሎቹ ላይ የተንጠለጠለ ነው።
-ይህን ቀዶ ጥገና የሚያካሂደው ሰፋፊ አልባሳት የለበሱ ፣ እራሳቸውን የሸፈኑ ፣ የፊት መሸፈኛ የለበሱ ፣ የእጅ ጓንቶችም ያጠለቁ ሰዎች ያሉበት የህክምና ቡድን ነው። ይህ አለባበሳቸው ግን ለዚህ ውስብስብና አደገኛ ስራ እንቅፋት አልሆነባቸውም።
-ከዚያ ግን "ሒጃብና ኒቃብ ስራን ፣እድገትንና ስልጣኔን ከሚያደናቅፉ እንቅፋቶች ውስጥ ናቸው' የሚል ሰው ታያለህ!!"

2

እናት፡ ብሩን የት እንደምደብቀው አላውቅም ልጄ ሁሉም ቦታ ብደብቀው ያገኘዋል ። ጎረቤት፡ መፅሀፍ ውስጥ ደብቂው እዛ ከሆነ መቼም አያገኘውም።

ከሰለፎች

ሐሰን አልበስሪ አንድ ሰው ክፉኛ እንዳማቸው አወቁና ጣፋጭ ቴምርና አነስተኛ መልእክት ላኩለት፤ መልእክቱም ወዳጄ ሆይ እንደምን ሰንብተሀል እንዳማኸኝ ባወቅኩ ጊዜ ይህን ጣፋጭ ቴምር ላኩልህ አምተኸኛል ብዬ አምቼህ ያገኘሁትን ምንዳ በዋዛ የማስነጥቅ ሞኛሞኝ አይደለሁም የሚል ነበር።

"ንጉሶችና የንጉሶች ልጆች እኛ ያለንበትን ደስታ ቢያውቁ ኖሮ ለኛ ነው የሚገባው ብለው ይጋደሉን ነበር" -ኢብኑ ተይሚያ